Hederlez ayının 14-dä amerikalı monah Kosmas Şarţ bir aylık vizitlän Gagauziyaya geldi. Bu vizit boba Kosmasın artık ikinci gelmesi. Bıldır sürmäk ayında o genä bir ay Gagauziyada yaşadı. Ozaman o Bibliyayı çevirän institutun teklifinä görä Moskvaya geldiydi, gagauz proektinin azalarınnan hem institutlan tanışmaa deyni. «Aydınnık» cümnä topluluu da teklif etti boba Kosması Gagauziyaya hem bir ay konukladı onu Komratta.

Bu yıl da Bibliyayı çevirän institut yaptı boba Kosmasa bir komandirovka Gagauz Erinä, çünkü bu vakıt o işleer gagauzça psaltir proektindä. Gagauziyada o isteer buluşmaa gagauzlarlan da yapmaa psaltir tekstinä aprobaţiya, okumaa insana o teksti da doorutmaa yannışlıkları.

Elbetki, bu vizitin başka sebepleri dä var, onnarın biri — taa derindän tanımaa gagauz kulturasını, taa çok lafetmää gagauzça, eni kişilärlän tanışmaa. Kim isteer buluşmaa bu meraklı adamnan, angısı Amerikada üürendi gagauz dilini da isteer izmet etmää gagauzlar için, var nasıl yapsın bunu bir ayın içindä. Bu nomerdän (0 79 79 50 79) var nasıl annaşasınız buluşma için. Umut ederiz, ani boba Kosmasın Gagauziyaya gelmesi olacek faydalı hem ona, hem onun yaptıı izmetä, ama taa çok faydalı olacek komratlılara hem Gagauziyanın hepsi yaşayannarına, angıları göreceklär, ani yabancı memleketlerdä dä gagauz dilini üürenerlär, da taa çok seveceklär ana dilini!

Bıldırkı haberlär boba Kosmas için:

http://gagauzinfo.md/index.php?newsid=11432

http://gagauzinfo.md/index.php?newsid=11620

http://edingagauz.com/content/view/5385/58/

http://www.noi.md/ru/news_id/37836/proj/1/news_cat/0/eea/noi.md/md/.noi.md/ru/noi.md

Kaynak: https://kopuzsesi.wordpress.com/

Просмотры (9)